उपक्रम

“सृष्टिमार्ग संस्था” ही पर्यावरण संवर्धनावर गेले नऊ वर्ष कार्यकरीत आहे. आम्ही आमचे कार्य ४ विभागात विभागले आहे.

• १. वृक्षारोपण, संरक्षण व संवर्धन करणे.
• २. पर्यावरणा विषयी प्रबोधन करणे
• ३. अपारंपारीक उर्जास्त्रोत, जसे सौर उर्जा, बायोगॅस यांचा वापर करण्यासाठी प्रोत्साहन देणे.
• ४. जैविक कचरा व ई-कचरा व्यवस्थापन करणे, यांत घरातल्या घरांत स्वयंपाक घरातील भाजीपाल्यांचा ओला कचऱ्या पासून खत बनविण्यासाठी आग्रही असणे आणि ईवेस्ट म्हणजे मोबाईल, कंम्प्युटर व सर्व इलेक्ट्रॉनिक कचऱ्याचे संकलन करून त्याला योग्य संस्थेकडे पुनर्वापरासाठी सोपविणे.

जमीनीवर जन्म घेऊन या सृष्टिचे वायु, जल, जमीन, प्रकाश व आकाश मोफत वापरत असल्याने माणसाचे जीवन क्षणाक्षणाला सृष्टिचे ऋणी होत आहे. या विचाराने यातून मुक्तीसाठी पर्यावरणाचे काम करणे आपले कर्तव्य आहे व ते केलेच पाहिजे, हा विचार संस्थेचा आहे. यामुळे आपण आपल्या जन्माच्या ऋणातून मुक्त झाले पाहिजे असा संस्थेचा जनतेला आग्रह आहे. सृष्टिमार्ग संस्था वर्षातून नियमीतपणे उपक्रम अनिवार्यपणे राबवते.

सृष्टीमार्गाचा संस्कार वर्ग दिनांक २० एप्रिल २०२३ ते ३१ एप्रिल २०२३ या दरम्यान घेण्यात आला. एल. एम. डी. चौक बावधन येथील ज्येष्ठ नागरिक संघाचा हॉल, महानगर पालिका विरंगुळा केंद्र येथे हा कार्यक्रम घेण्यात आला. यांत महानगर पालिकेतील शाळेच्या चौथी व पाचवीतील विद्यार्थी व विद्यार्थिनींनी भाग घेतला. सृष्टीमार्ग संस्थेने ठरवून दिलेल्या सिलॅबस अनुसार विद्यार्थ्यांना डॉ. शरयु पुराणकर, श्री. उल्हासराव पुराणकर यांनी शिकविले. यांत धार्मिक श्लोक व स्तोत्र याव्यतिरिक्त दिशा, ऋतु, महिने, नक्षत्र, पर्यावरण बदल, वायु प्रदूषण, जल व ध्वनी प्रदूषणाबद्दल शिकवले. याशिवाय प्रत्येक दिवशी एकदोन नवे जाणकार सभासद येऊन विद्यार्थ्यांचे वेगवेगळ्या क्षेत्रातील ज्ञान व मनोरंजनाचे कार्यक्रम घेत होते. या विशेष कार्यक्रमांत संध्याताई भालेराव, डॉ. लवलेकर, श्री. सुबोध बल्लाळ, सौ. शोभाताई पांडे, सौ. घोटेकर, श्रीमती बुलबले, श्री. उदय दाणी, सौ. किर्ती कुलकर्णी, श्री. विनायक अभ्यंकर यांनी मुलांना ज्ञान आणि मनोरंजनाचे कार्यक्रम देऊन कार्यक्रमाला आकर्षक बनविले. शेवटच्या दिवशी प्रमुख पाहुणे म्हणून श्री. गिरीष कुलकर्णी यांना आमंत्रित केले होते. त्याच बरोबर मुलांना रोज खाऊ तर मिळायचाच पण शेवटच्या दिवशी भेटवस्तू आणि प्रमाणपत्र देण्यात आले.

उन्हाळ्यात आंबे येतात. ते सर्वांच्या आवडीचे असल्याने घराघरांत खाल्ले जातात. आंबा हा भारतीय वृक्ष आहे. त्याची थंडगार छाया व उत्तम गुणधर्मामुळे त्याची लागवण करणे, मनुष्य, पशुपक्षी व एकंदर पर्यावरणासाठी आवश्यक आहे. आंब्याच्या कोईची साठवणूक करण्याची सवय जाऊन त्याच्या वृक्षारोपणासाठी उपयोग करण्याची आवड निर्माण व्हावी यासाठी "ड्राय मँगो सीडस् कलेक्शन" हे अभियान घेण्यात आले. या कोईला स्वच्छ तीनदा पाण्याने धुणे, तीला एक आठ दिवस कडक उन्हात वाळविणे व त्याला प्लॅस्टिक पेपर न वापरता कागदी किंवा सुती पिशवीत साठवून ठेवणे हे अभियानात भाग घेणाऱ्यांकडून अपेक्षित होते.

दि. २४ जून २०२३ बुधवार रोजी
आंतरराष्ट्रीय योग दिवस हा २१ जूनला असतो. मात्र त्या दिवशी सुट्टी नसल्याने हा दिवस संस्थेने २४ जून शनिवार रोजी दुपारी ४ ते ६ या वेळेत साजरा केला. अनुभवी योग शिक्षिका सौ. शोभाताई पांडे यांच्या मार्गदर्शनाखाली हा कार्यक्रम झाला. त्यांनी अनेक योगासने, आपल्या शिष्येच्या सहाय्याने करून दाखविली. त्याचे वर्णन करून सांगितले. प्रत्येक योग हा कोणत्या शारिरीक व्याधीवर प्रभावी असून तो बरा करतो ते सांगितले. शेवटी दर्शकांच्या प्रश्नांना त्यांनी उत्तरे दिली. सर्व प्रेक्षक योग प्रेमी होते. त्यांना पुन्हा एकदा योगाचे महत्व पटवून दिले. एकंदरीत हा कार्यक्रम उपयोगी व रुचकर झाला यात शंका नाही. हा कार्यक्रम ऑनलाईन होता म्हणून पुण्यातील व पुण्याबाहेरील सदस्यांनी पण तो पाहिला.

वनविभागाने वृक्षारोपणासाठी दिलेल्या शिरगाव टेकडीवर दिनांक १० आणि ११ जून शनिवार व रविवार या दिवशी वृक्षारोपण दिन साजरा करण्यात आला. संस्थेचे सदस्य, त्यांच्या कुटुंबातील सदस्य, किशोर वयातील मुले-मुली मोठ्या उत्साहाने वृक्षारोपणासाठी आली होती. त्या दिवसात एकशे पंचवीस वृक्ष नर्सरीतून विकत आणले व लावले. यात कडुलिंब, आपटा, करंज, पिंपळ, वड, अर्जुन ही झाडे लावली. याशिवाय आंबा, बेल, जांभुळ, कदंब हे वृक्ष पण लावले.

काही वृक्ष सदस्यांनी आपल्या घरून आणली होती. वृक्षारोपणाला निकुंज हुद्दार, पियुश कुलकर्णी, आदित्य गांधी, योगेश महाशब्दे, शुभांगी महाशब्दे, केशवराव महाशब्दे, मेघा चौरे, आशा पाटिल, मि. चौरे, अरुण पुराणिक, स्मृती पुराणिक, केतन घुमरे याशिवाय मोठ्या संख्येने इतर लोकही उपस्थित होते. तसेच वनविभागाचे दोन अधिकारीपण आपल्या विनंतीवरुन आवर्जुन उपस्थित होते. एकूण तीस जण उपस्थित होते. वृक्षारोपण झाल्यावर सर्वांना अल्पोपहार व चहा देण्यात आला.

या पूर्वीच चार दिवसापूर्वी ऐशी खड्डे खणून ठेवले होते. त्यात शेण खत टाकून वृक्ष लावण्यात आले. यात मोठा वाटा वनविभागाचा आहे. त्यांनी जेसीबी मशीन लावून पाच आडव्या चरा टेकडीवर खणून दिल्या ज्यामुळे टेकडीचे पाणी तेथेच मुरेल. वृक्षाची काळजी येत्या वर्षभर घेणार या प्रतिज्ञेसह कार्यक्रम समाप्त झाला.

दिनांक ३० जुलै २०२३ रविवारी सकाळी ९ ते २ ला सफायर सोसायटी येथे रक्तदान शिबीर आयोजित केले होते. कार्यक्रमाची सुरुवात संस्थेचे अध्यक्ष अरुण पुराणिक व सफायर सोसायटीचे अध्यक्ष श्री. दिलीप काका ठाकूर व सचिव श्री. वरद भालेराव, श्री. संजय कुंभार यांचे हस्ते दिप प्रज्वलन करुन कार्यक्रमास सुरुवात झाली. कार्यक्रमामध्ये ३५ रक्त पिशवी गोळा करुन वाय.सी.एम. हॉस्पीटल पिंपरी येथील रक्त पुरवठा संस्थेला देण्यात आल्या. सदर शिबीरामध्ये महिलांचा उत्स्फूर्त प्रतिसाद होता. शिबीराचे वैशिष्ट्य म्हणजे श्री. भास्कर बडगुजर या परिवारातर्फे आई व पुत्र या दोघांनी रक्तदान केले.
रक्तदानामध्ये सफायर सोसायटीचे पदाधिकारी, सभासद यांचा सहयोग लाभला. यात उल्लेखनीय योगदान सृष्टीमार्ग संस्थेचे सदस्य अॅडव्होकेट मिलिंद कुलकर्णी व रेवा कुलकर्णी यांचे होते. त्यांनी हा कार्यक्रम पुढाकार घेऊन घडवून आणला. यात मुख्य सहयोग व मार्गदर्शन श्री. योगेश महाशब्दे, उपाध्यक्ष सृष्टीमार्ग संस्था यांचे होते. संस्थेला वाय.सी.एम. हॉस्पिटल तर्फे प्रमाणपत्र व ट्रॉफी देण्यात आली.

दि. ३० जुलै २०२३ रविवार दुपारी ३ ते ६ वाजता गोदावरी हॉल, देहू येथे आयोजित करण्यात आला.
सर्वप्रथम प्रमुख पाहुणे, कलाकार व सदस्यांचे स्वागत करण्यात आले. सामुहिक वंदना "जलाशये पतितम् तोयम्....." या श्लोकाने कार्यक्रम सुरु झाला. गीत मुख्य स्वरात शरयु पुराणकर यांनी म्हटले. त्यानंतर संस्थेचे आधार स्तंभ असलेले माननीय विश्वस्त श्री. अनंत दामले व कार्यकारी अध्यक्ष श्री. दत्तात्रय जोशी यांच्या आकस्मात मृत्यु झाल्याने त्यांना दोन मिनिट मौन ठेवून श्रध्दांजली देण्यात आली. नंतर प्रमुख पाहुणे श्री. आर. एस. कुमार (माजी महापौर, पि.चिं. महानगरपालिका) यांच्या हस्ते गुरुपूजन झाले व श्री. एम. एल. वागनू (लष्कर अधिकारी) यांचे संस्थेच्या अध्यक्षांनी स्वागत केले. त्यानंतर सौ. मृण्मयी लेले यांनी शास्त्रीय संगीतावर आधारीत सुंदर नृत्य सादर केले. हे आजच्या कार्यक्रमाचे प्रमुख आकर्षण होते. त्यानंतर आमंत्रित मुख्य वक्ते श्री. सुबोध बल्लाळ यांनी संत-साहित्यात निसर्गाचे महत्व अधोरेखित करुन प्रेक्षकांची प्रशंसा मिळवली. मग अध्यक्षांनी संस्थेचे वृक्षारोपण वृक्ष संगोपनात स्नेहपूर्ण वागणूकिचे महत्व सांगितले. (अध्यक्ष श्री. अरुण पुराणिक). मध्यांतर झाल्यावर संध्या भालेराव, सौ. किर्ती कुलकर्णी, सौ. शरयू पुराणकर, सौ. प्रतिमा कुलकर्णी, सौ. नंदिनी चौक, डॉ. लवलेकर, श्री. उल्हास पुराणकर, आदित्य गांधी यांनी गायन, कविता वाचन इ. मनोरंजनात्मक कार्यक्रम सादर केले. श्री. योगेश महाशब्दे यांनी आभार प्रदर्शन केले व पूजा नरवडे हिने कार्यक्रमाचे सूत्रसंचालन केले. अल्पोपहार नंतर कार्यक्रम समाप्त झाला.

सृष्टीमार्ग संस्था पुणे ची वार्षिक सर्वसाधारण सभा दि. १० सप्टेंबर रोजी नक्षत्र अपार्टमेंट, विवेकनगर, आकुर्डी येथे दुपारी ४ वाजता घेण्यात आली. ही सभा ऑनलाईनवर पण उपलब्ध होती. या सभेस २० सभासद उपस्थित होते. या सभेत अध्यक्षांनी संस्थेचे विचार आत्मसात करण्यासाठी सृष्टीमार्ग संस्थेची पाच ही पुस्तके वाचायचा आग्रह केला. आपआपसात प्रत्येकान संवाद करणे व तरुण कार्यकर्त्यांनी पुढाकार घेऊन कार्य करण्याचा तसेच नवे तरुण सदस्य बनविण्याचा सल्ला दिला. या सभेत मागच्या वर्षीचा २०२२ - २३ चा अहवाल सादर केला. तो मंजूर झाला तसेच वर्ष २०२३-२४ चे उपक्रम व त्यासाठी लागणारा खर्च सादर केला. सृष्टीमार्ग संस्थेला फेब्रुवारी २०२४ मध्ये दहा वर्ष पूर्ण होत आहेत. यावेळी असा प्रस्ताव पास झाला की आठ-दहा वर्षापासून संस्थेचे आजीव सदस्य असणाऱ्यांनी पुन्हा एकदा कमीत कमी एक हजार रुपये तरी देणगी द्यावी. श्री. आमोद दुराफे यांनी संस्थेच्या उद्दिष्टांना अनुसरुन सोलार एनर्जीचा वापर वाढवावा व यासाठी 'गोदावरी' हॉलवर सोलार बसवावे असा प्रस्ताव मांडला. तरुणांसाठी तरुणांना आवडणारे कार्यक्रम जसे ट्रेकिंग, मैदानी खेळ, सायकल रॅली इत्यादी करण्याचा प्रस्ताव मांडला.
सध्याच्या अतिथी अध्यक्ष श्रीमती संध्या भालेराव यांच्या कार्यकाळ समाप्तीवर त्यांचे शतशः आभार प्रदर्शित करण्यात आले. नंतर सर्वानुमते श्री. वसंतराव देशपांडे यांना पुन्हा एकदा अतिथी अध्यक्ष म्हणून नियुक्त केले गेले व धन्यवाद प्रस्तावानंतर सचिव शुभांगी महाशब्दे यांनी सभा समाप्त झाल्याची घोषणा केली.

संस्थेद्वारे गरीब विद्यार्थ्यांना दिवाळी च्या निमित्त फराळ वाटपाचा कार्यक्रम दि. ८ नोव्हेंबरला "स्वामी विवेकानंद ई- लर्निंग स्कूल, एल.एम.डी. चौक, बावधन चौक, पुणे" येथे दुपारी १२ ते १ या सुमारास झाला. या कार्यक्रमात आठ वर्षे वयोगटातील मुले सम्मालित होती. प्रथम बावधन शाखेचे अध्यक्ष श्री. अरुण पुराणिक यांनी संस्थेची माहिती, पर्यावरणम्हणजे काय? प्रदूषण म्हणजे काय ? हे विद्यार्थ्यांना सांगितले. श्री. वसंतराव देशपांडे यांनी मातृ, पितृ ऋण ह्या संबंधी मुलांना माहिती दिली व समाजात मातापित्यांचा सन्मान वाढविण्यासाठी चारित्र्यवान होण्याचा आग्रह केला. संध्या भालेराव यांनी हास्य कलेतून मुलांना आपलंस केलं. नंतर मुलांना संस्थेची "सण पर्यावरण साजिरे" हे पुस्तक व फराळाचे पाकीट देण्यात आले. शिक्षिकांना संस्थेची निसर्गवाणी पत्रिका देण्यात आली. सर्व सोहळा आनंदात पार पडला. संस्थेकडून सौ. किर्ती व किरण कुलकर्णी, श्री. सुधीर पुरकर हे हजर होते.

यावर्षी सृष्टीमार्ग संस्थेची सहल दि. २४ डिसेंबर २०२३ रोजी रविवारी वनविहार व निसर्गदर्शनासाठी रोहिडेश्वराच्या पायथ्याशी भोर येथे गेली होती. एक छोट्या टेकडीला गोल वळसा घेऊन वाहणारी निरा नदी व तिच्या प्रवाहामुळे तयार झालेला 'नेकलेस' म्हणजे निसर्गाचा चमत्कारच आहे. तेथून निघून आम्ही भोर या गावी पोहोचलो. या गावाला शिवकालीन वारसा लाभला आहे. त्यातील एक म्हणजे त्यांच्या पंतसचिव यांचा 'राजवाडा' हा आजही सुस्थितीत आहे. शिवाजी महाराजांच्या पदरी असलेले पराक्रमी सरदार कान्होजी जेधे यांचे वंशज श्री. अशोक जेधे यांनी येथे हिरवागार मळा फुलविला आहे. या एक एकर जमिनीत त्यांनी आंबा, चिक्कू, फणस, नारळ, सिताफळ, रामफळ एवढेच नव्हे तर सफरचंदांची झाडे पण लावली आहेत. तसेच जाई, जुई, शेवंती, जास्वंद इ. फुलझाडे ही लावली आहेत. औषधी वनस्पती लावल्या आहेत. प्रदुषण मुक्त अशा या वातावरणात सर्वांची मने आनंदाने फुलून गेली. तेथे फराळ करुन आम्ही रायरेश्वराच्या पायथ्याशी गेलो. याच गडावर शिवाजी महाराजांनी आपल्या सवंगड्यांसह स्वराज्य स्थापनेची शपथ घेतली होती. तेथे पायथ्याशी असलेल्या पुरातन नागेश्वर महादेवाचे गोमुखातून येणाऱ्या पवित्र तिर्थाचे दर्शन केले. पुढे जाऊन नीरा नदीवर बांधलेले देवधर धरण बघीतले. मोकळी हवा, शांत परिसर, हिरवेगार रान, अनेक प्रकारचे लहान मोठे डौलदार वृक्ष, पाठीशी उंच डोंगरकडे असा निगर्सभ्रमणाचा आनंद घेतला. नंतर परत जेधे यांच्या शेतमळ्यावर परत आलो. तेथे दुपारचे भाजी भाकरीचे व गोडाचे स्वादिष्ट जेवण निसर्गाच्या सान्निध्यात घेतले.
श्री. अरुण पुराणिक, अध्यक्ष यांनी संस्थेची उद्दिष्ट्ये व ध्येय, अभियान याविषयी दोन शब्द बोलले. त्या आधी सौ. डॉ. शरयु पुराणकर यांनी संस्थेच्या वर्षभराचा उपक्रमाबद्दल माहिती सांगितली. नंतर चहा पानानंतर आम्ही आपल्या सर्व बसमध्ये बसलो व परतीच्या प्रवासाला निघालो. सहल उत्तम झाल्याचे समाधान सर्व ३२ प्रवाशांनी व्यक्त केले.

ई-वेस्ट संकलनाचा कार्यक्रम दरवर्षी २६ जानेवारी ला घेण्यात येतो. ई-यंत्रण संस्था आणि नगरपालिका व इतर सामाजिक संस्थांच्या सहकार्याने हा कार्यक्रम घेण्यात येतो. ई-वेस्ट हे सध्या आधुनिक जगात मोठा गंभीर प्रश्न होत आहे व पर्यावरण व आरोग्याला अत्यंत घातक आहे. यावर्षी सृष्टीमार्ग संस्थेने नक्षत्र अपार्टमेंटच्या वाहनतळाच्या जागेत हा कार्यक्रम केला. ई-वेस्ट म्हणजे काय ? त्याचे दुष्परिणाम व ई-वेस्ट पासून पुर्नवापरासाठी तयार केलेल्या वस्तू याविषयी आसपासच्या इमारतीत मौखीक व बॅनरद्वारे जनजागृती करण्यात आली.
हा कार्यक्रम सकाळी ९ ते दुपारी २ वाजेपर्यंत घेण्यात आला. त्यात ८ लोकांनी लॅपटॉप, मोबाईल, स्पीकर, चार्जर, कार्ड कनेक्टर असे बरेच ई-वेस्ट आणून दिले. काही दिवसांनी या देणगीदारांना प्रमाणपत्र पण देण्यात आले. सर्व कार्यक्रम यशस्वीरितीने पार पडला याचे समाधान वेस्ट कलेक्शन करणाऱ्या संस्थेने सुद्धा व्यक्त केले.  

कार्यशाळा दि. १८ फेब्रुवारी रविवारी रोजी कोथरुडच्या गुरु गणेश हौसिंग सोसायटीच्या सभागृहात घेण्यात आली. कार्यशाळेत ३० सदस्यांनी भाग घेतला. प्रथम स्वागत प्रार्थना झाली. नंतर सृष्टीमार्ग संस्थेचा परिचय सौ. शोभा पांडे यांनी करुन दिला. याआधी काही दिवस अगोदरच नवीन कार्यकारिणी स्थापन झाली होती. त्यांच्या माहितीसाठी संस्थेची शासनमान्य अधिकृत विधान व नियमावली श्री उल्हास पुराणकर आणि श्री. श्रीपाद पांडे यांनी समजावून सांगितली. नंतर अरुण पुराणिक यांनी संस्थेची कार्य व कार्यकारी मंडळाची जबाबदारी या विषयावर प्रकाश टाकला. श्री. वसंतराव देशपांडे यांनी दुबईत झालेल्या (कॉन्फरन्स ऑफ पार्टिज) सीओपी - २८ मधील चर्चित विषयावर प्रकाश टाकला. श्री. सुबोध बल्लाळ यांनी अतिथी वक्ता श्री. भिसे साहेब यांचा लेख वाचून दाखविला. या सर्व भाषणातून नव्या जुन्या सदस्यांचे योग्य प्रबोधन झाले. हेच कार्यकर्ते पुढे जाऊन समाजात पर्यावरण संवर्धन व संरक्षणाबद्दल जनजागृती करतील. शेवटी सौ. किर्ती कुलकर्णी, श्रीमती संध्या भालेराव व शरयू पुराणकर याननी 'हरियाली छायी रहे' हे संस्थागीत म्हटले. सौ. चारुलता पुराणकर यांनी सूत्रसंचालन केले व श्री. तुषार पुराणकर यांनी आभार प्रकट केले.

वर्धापन दिन १७ मार्च रविवार रोजी सावरकर भवनाच्या कॅप्टन कदम सभागृहात घेण्यात आला. वेळ दुपारी ४ ते ७ वाजेपर्यंत होती. या कार्यक्रमाला प्रसिद्ध पर्यावरण तज्ञ श्री. रघुनाथ ढोले हे प्रमुख वक्ते लाभले होते. कार्यक्रमाची सुरवात सृष्टीमार्ग संस्थेच्या प्रार्थनेने झाली. यावर्षी नवीन कार्यकारिणी व काही ट्रस्टी बदलल्या आहेत म्हणून नवीन ट्रस्टी श्री मृणाल सेनगुप्ता व श्री. मंगेश महाशब्दे यांचा परिचय सभेला करुन देण्यात आला. यानंतर निसर्गवाणी अंकात प्रसिध्द झालेला उत्तम लेख व कवितांना पुरस्कार जाहिर करण्यात आला. त्यांत श्री. सुबोध बल्लाळ, श्री. वसंतराव देशपांडे, श्री. तुषार पुराणकर, श्री. उदय दाणी व सौ. पल्लवी कोंडेकर यांच्या कवितांना पुरस्कार मिळाला.
प्रथमच यावर्षी पासून वृक्षारोपणावर मनापासून भरपूर काम करणारे श्री. देवेंद्र चौरे यांना "स्व. दत्तात्रय जोशी वृक्षारोपण पुरस्कार" देण्यात आला. तसेच उत्तम सामुहिक सामाजिक उपक्रमासाठी "स्व. अनंत दामले पुरस्कार" श्री. मिलिंद कुलकर्णी यांना देण्यात आला. सृष्टीमार्ग संस्थेसाठी केलेले मोठे काम लक्षात घेऊन स्व. अनंत दामले यांच्या पत्नी आरती दामले आणि स्व. दत्तात्रय जोशी यांच्या पत्नी मोहिनी जोशी यांना संस्थेचे गौरव आजीव सदस्यत्व देण्यात आले. मागचे वर्ष २०२२-२३ वर्षात श्रीमती संध्या भालेराव ह्या अतिथी अध्यक्ष होत्या. त्यांनी सदस्यता वाढीबद्दल बराच प्रयत्न केला याप्रित्यर्थ त्यांचा शाल व सर्टिफिकेट देऊन सत्कार करण्यात आला.
वर्धापन दिनाचे मुख्य अतिथी होते श्री. रघुनाथ ढोले. ते देवराई फाऊंडेशनचे संस्थापक आहेत. त्यांचा वृक्षसंवर्धनाचा मोठा अनुभव असून त्या क्षेत्रात भरपूर ज्ञान आहे. विश्वस्त श्री. वसंतराव देशपांडे यांनी त्यांना मंचापर्यंत आणले व अध्यक्ष अरुण पुराणिक, तसेच श्री. उल्हासराव पुराणकर आणि श्री. केशवराव महाशब्दे यांनी त्यांचे स्वागत केले. आपल्या भाषणात श्री. ढोले साहेबांनी देवराईची संकल्पना स्पष्ट करून सांगितले. गावोगावी पूर्वी एखाद्या देवाला, झाडे लावून अर्पण करीत असत. त्या झाडाचा उपयोग गावकरी करीत नसत तर ते पशुपक्षांसाठी असे. यामुळे वृक्षसंवर्धनास प्राधान्य मिळत असे. एका एकरात चारशे विशिष्ट प्रकारची झाडे जी एकमेकांना पोषक आहेत अशी लावावी त्यामुळे ती झाडे जगतात व वाढतात अशी ही संकल्पना आहे.
त्यानंतर श्री. दिलीप गायकवाड यांनी आपल्या वाद्यांनी व करावकेच्या माध्यमांनी अनेक मराठी व हिंदी गाणी गाऊन लोकांचा खूप प्रतिसाद मिळविला. संस्थागीत सौ. किर्ती कुलकर्णी व संध्या भालेराव यांनी सादर केले. श्री. तुषार पुराणकर यांनी आभार मानले व सौ. पल्लवी कोंडेकर यांनी सूत्र संचालन केले.